Тыыллымаҕа  оҕо спортивнай оскуолатын буулдьанан ытыыга салаата 2008 сыллаахтан  тренер Семен Костромыкин салалтатынан үлэлиир. Оскуолаҕа анал спортивнай залга эрчиллэр сир тэриллэн, интернат арыллан үлэлии турар.

  Семен Васильевич – ССРС спордун маастарыгар кандидат, Саха сирин физическэй культураҕа уонна спортка туйгуна, үрдүк категорялаах тренер-преподаватель. Сыллата эрчиллэр оҕолор  араас таһымнаах күрэхтэһиилэргэ улуус чиэһин көмүскүүллэр,оройуоҥҥа иннилэрин кимиэхэ да биэрбэттэр. Бастыҥ көрдөрүүлээх иитиллээччитинэн 2012  cыллаахха Россия оҕолорго кыайыылааҕа буолбут, Россия спордун маастара Чаара Иванова буолар. Кини Нам улууһуттан кэлэн Тыыллыма сокуолатыгар үэрэммитэ. Майаҕа эрчийбит оҕото Марина Бандерова - Саха сирин дьахталларга чемпионката, эмиэ Россия спордун маастара, Олимпийскэй эрэллэри бэлэмниир училище студентката. Саха республикатын спордун маастардарынан, Баһылай Манчаары спартакиадатын кыргыттарга чемпионката уонна призера Клава Константинова уонна Гриша Петров буолаллар. Билиҥҥи үэрэнээччилэртэн бастыҥынан  республика кыргыттарга үрүҥ көмүс призера, бастакы спортивнай разрядтаах Дайаана Петрова биллэр.

   Оскуола баазатыгар оройуон буулдьанан ытыыга күрэхтэһиилэрэ тэриллэллэр. Быйылгы куоталаһыыга Тыыллыма оҕолорун кытта Майа уонна Төҥүлү оскуолаларыттан мустан саастарынан арахсан винтовканан уонна бэстилиэтинэн ытыыга күөн көрүстүлэр.

  Винтовканан ытыыга кыра оҕолорго кыайыылаахтарынан Тыыллыматтан Настя Гагина уонна Миша Лукин буоллулар, бириистээх миэстэлэргэ Диана Игнатьева, Рада Алиева, Ян Назаров, Ваня Прокопьев киирдидэр.  Орто саастаахтарга Майа кыргыттара Люда Барахова уонна Диана Федорова бастакы-иккис, үһүс миэстэҕэ Тыыллыматтан Лера Борисова таҕыста. Уолаттарга Айсен Петров, Игорь Тимофеев, Эрсан Лукин ааттаммыт бэрээдэгинэн  призердар кэккэлэригэр киирдилэр. Улахан уолаттарга Төҥүлүттэн Слава Куличкин кыайыылаах таҕыста, кыргыттарга Дайаана Петрова ырааҕынан чорбойдо. Саҥа дьарыгыран эрэр Төҥүлү оҕолоро Юля Кардашевская, Вера Кычкина үрүҥ көмүс уонна боруонса мэтээл хаһаайыннарынан буоллулар.

   Бэстилиэтинэн ытыыга Лева Осипов (Тыыллыма) Саша Никаноровы (Майа) кытта тэҥ көрдөрүүлээх чемпион аатын сүктэ. Боруонса мэтээли  Майа уола Арсен Игнатьев ылары ситистэ.

Кыргыттарга күүтүллүбүтүн курдук Тыыллымалар Анжелика Бродникова, Милена Игнатьева, Дайаана Павлова ааттаммыт бэрээдэгинэн пъедесталга кими да таһаарбатылар. 

   Быйылгы дьылтан Майаҕа Александр Сидоров, Төҥүлүгэ Гаврил Цыпандин эмиэ спорт бу көрүҥэр оҕолору уһуйаллар. Сотору кэминэн аны кинилэр иитиллээччилэрэ үрдүк таһымҥа тахсаннар улууспутугар буолар күрэхтэһиилэргэ киирсиилэр сытыархайыахтара , улуус, Саха сирин  чиэһин көмүскүүр оҕолор үүнэн тахсыахтара диэн күүтэбит.