Оҕунан ытыыга оройуон кыһыҥҥы чемпионата урут 80-c ыытыллара. 2018 сылтан саҕалаан үтүө үгэс сөргүтүллэн, быйыл үһүс сылын субуруччу ыытылынна. Чемпионакка барыта 37 спортсмен, ол иһигэр биир РФ спорун маастара, сэттэ маастарга кандидаттар улууспутугар ким бэргэн ытааччы буоларын быһаарыстылар. Бигэргэммит быраабылаҕа олоҕуран күрэхтэһии 18 миэтэрэ ыраахтан , ытыы үс ньыматынан арахсан барда.

   Классическай оҕунан ытыыга эр дьоҥҥо боруонса мэтээл иһин икки маастарга кандидаттар көрсүбүттэригэр Михаил Никитин Эдуард Федоровы баһыйан кыайыылаах таҕыста. Онтон 2-c спортивнай разрядтаах 16 cаастаах Алик Колесов финалга маастарга кандидат Владислав Тарабукины соһуччу кыайан оройуон чемпионун аатын ылла. Дьахталларга боруонса мэтээли эмиэ оскуола оҕолоро Маша Спиридонова уонна Камилия Попова былдьаһыылара 2-c спортивнай разрядтаах Спиридонова туһатыгар түмүктэннэ. Онтон финалга Баһылай Манчаары 2005 сыллааҕы спартакиадатын боруонса призера, маастарга кандидат Айталы Артамонова уонна Баһылай Манчаары 2017 сыллааҕы спартакиадатын дьахталларга абсолютнай чемпионката, дьахталларга бастакы Саха республикатын спордун маастара Евгения Титова көрсүһүүлэрэ Титова эрэллээх кыайыытынан түмүктэннэ. Инньэ гынан быйылгы улуус чемпионнарынан оскуола оҕолоро буоллулар, иккиэн улуус старшай тренерэ Прокопий Васильевка эрчиллэллэр.

    Блок оҕунан ытыы күрэхтэһиитэ  спорт маастара Семен Захаров эрэллээх кыайыытынан түмүктэннэ. Кини финалга Александр Титову сабырыйда. Онтон Александр Титов бу күрэхтэһиигэ спорт маастарыгар кандидат нуорматынан ытан, күүстээх ытааччы Василий Марковы туораппытын бэлиэтиэххэ сөп. Маастарга кандидат Василий Марков Ганя Емельяновы тэҥнэһэн баран эбии көрдөрүүнэн кыайан боруонса мэтээл хаһаайынынан буолла. Кыргыттарга блок оҕунан ытыыга Ангелина Аргунова 2-c спортивнай разряд нуорматын толорон чемпион аатын сүктэ. Чэлгийээнэ Березкина уонна Лейла Олейникова пъедестал иккис-үһүс үктэллэригэр таҕыстылар.

   Былыргы сахалыы оҕунан ытыыга боруонса мэтээл хаһаайынынан Чүүйэттэн Айаал Петров буолла. Кини үһүс миэстэни былдьаһыыга опыттаах ытааччы Маргарита Захарованы баһыйда. Онтон финалга Саха сирин федерациятын кубогын кыайыылааҕа Виктория Борисова маастарга кандидат Гаврил Егоровы кыайа тутан улуус чемпионкатынан буолла.

   Мантан саас оҕунан ытыыны Мэҥэ-Хаҥаласка төрүттээбит Василий Тихонович Гаврильев 80 сааһыгар аналлаах уонна Үргэл Кривогорницын кэриэһигэр  үгэс буолбут күрэхтэһиилэр Майаҕа ыытыллыахтара.