Соторутааҕыта Московскай уобалас Королев куоратыгар боксаҕа юниор кыргыттар ортолоругар  Россия чемпионата буолан ааста. Саха сириттэн  ити 17-18 саастаах кыргыттар күрэхтэһиилэригэр  Хара спортивнай орто оскуолатыттан тренер А.Д.Монастырев иитиллээччитэ Алия Стручкова ситиһиилээхтик кыттан боруонса мэтээл хаһаайынынан буолла. Бастакы эргииргэ Наташа Липатова диэн Ногинскай куорат (Москва уобалаһа) кыыһын 5:0 хоппута. Иккиһигэр Айгель Ходованы (Самара к.) 4:1 баһыйда. Үһүс киирсиитигэр Софико Черепенинаҕа очконан хоттордо. Онон Алия ити ситиһиитэ өрөспүүбүлүкэҕэ кыргыттар ортолоругар ситиһиллэ илик биир бастыҥ түмүгүнэн буолар.

     Күрэхтэһии иннинэ Төхтүр оскуолатыгар  баран бокса базатыгар уолаттары кытта  СӨ үтүөлээх тренерэ В.Ю.Шестаковка дьарыктаммыта. Алияны күрэхтэһиигэ РФ  үтүөлээх маастара, дьахталларга профессиональнай боксаҕа аан дойду чемпиона Оксана Васильева-Грюза көрөн-истэн, сүбэлээн-амалаан илдьэ сырытта. Алия онон Россия спордун маастарыгар кандидат нуорматын толордо, дойду сүүмэрдэммит хамаандатын  састаабыгар киллэрилиннэ.

     Алияны төрөппүттэрэ Алексей Анатольевич (Хара спортивнай орто оскуолатын директора) уонна Любовь Валериевна Стручковтар оҕо эрдэҕиттэн спордунан дьарыктанарга көҕүлээбиттэрэ. Кыра кылаастарга Төхтүр оскуолатыгар тренер Н.С.Егоровка сүүрүүнэн дьарыктаммыта, оройуоҥҥа бэйэтин саастыылаахтарыгар чемпионнуура. Алтыс кылаастан боксанан дьарыктанар. Бастакы тренерэ Владимир Афанасьевич Петров. В.А.Петров билигин Аллараа Бэстээххэ тренердиир.

     Хара спортивнай орто оскуолатын 10 кылааһын бастыҥ үөрэнээччитэ, байыаннай-патриотическай кулууп актыыбынай кыттыылааҕа Алия Стручкова спортка ситиһиилэрэ өссө да кэлэ туруохтара диэн эрэнэбит.

                                                                                                                   Афанасий Илларионов